Sunday, April 8, 2007

في زكري مذبحة بحر البقر

اغارت القوات الاسرائيليه على مدرسة بحر البقرالابتدائيه

فدمرت المكان و تركت ورائها 77 شهيداً و جريحا من الطلبه و المدنيين

انا هسيبكم مع قصيده جميله لعمنا صلاح جاهين بيعبر فيها عن كل اللي ممكن نحس بيه

القصيده بعنوان

الدرس انتهى
الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس
..ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …
ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس
تحياتي لكل شهدائنا
تحياتي لكل معتقلينا
تحياتي لكل من له قلب
تحياتي
الشارد

3 comments:

ياسر شمس الدين said...

جامده جدا يا شارد

تحياتى ليك

alshared said...

ألف شكر يا ياسر

تحياتي

vetrinary said...

ايه رايك فى البقع الحمرا
يا ضمير العالم يا عزيزى


مفتتح يحتاج الى كتاب لشرحه