يس أيه المقدمات والاسباب اللي خلت السؤال دهيستحوذ علي تفكيري
.
الحقيقه السؤال ده بدء يفرض نفسه علي تفكيري بعد عدة مواقف واحداث
يوم الجمعه بالليل
كنت في النت كافيهمكنتش دخلت نت من حوالي أسبوع ونصوكنت مركز جدا في ماتش شطرنج اون لاين وتقريبا منفصل عن الناس اللي في المكان كلهم
المهم
سمعت حد بيتكلم وبيقول الافران كلها بطلت ومفيش عش خالص
أنا قولت في عقل بالي أيه الهبل ده والمهم محتطش الموضوع في دماغي وكملت تركيزفي الماتش
بعد ما خلصت كنت جعان فرجعت الشقه ولقيت الشباب نازلين يجيبوا أكل
لحد كده مفيش مشاكل
الشباب نزلوا وقعدوا بره يجي ساعه واحنا جعانين ومستنينهم
وده مش طبيعي لان المكان اللي بنجيب منه الاكل قريب جدا
أنا محطتيش في دماغي أن فيه مشاكل انا قولت بيتمشوا أو قابلوا ناس أصحابهم فوقفوا معاهم
.
بعد ما رجعوا لقيتهم مش جايبين عيش
يا خبر
ملحوظه:/ أنا بتكلم عن العيش السياحي أبو ربع ونص جنيه
مالناش دعوه بالعيش التاني
.
أيه يا جدعان اللي حصل؟
متخيلين ساعه كامله بيلفوا علي عيش
الافران كلها مقفوله ومفيش ولا رغيف يوحد ربه
.
لا حول ولا قوة الا بالله
أنا الحمد لله كان معايا عيش من البلد وأكلنا
.
اصحاب الافران راحوا يشتروا دقيق لقيوا الطن زايد الف جنيه
فقفلوا ألافران والناس ماعدتش لاقيه عيش تأكله
والناس اللي كانت شغال في الافران دي ماعدتش لاقيه شغل
.
يبقي لا أكل ولا شغلوموت وخراب ديار
وهنا بدأ هذا السؤال يلح علي تفكيري
.
أنا قررت أنزل البلد تاني يوم بعد المحاضرات
.
وأنا في البلد
سمعت والعهده علي الراوي
أن فيه ناس مش فوق مستوي الشبهات راحوا للفلاحين وبيشتروا منهم فدان القمح ب 12 ألف جنيه وبيشتروها خضره يعني الفلاح مالوش دعوه الارض جابت أو ماجبتش هوه باع المحصول أخضر
أيه المشكله هنا؟
الكلام ده بيكون عادي جدا في أي دولهرأسماليه
بس عندنا في مصر الحكومه بتاخد أردب القمح من الفلاح ب500 جنيه ده بعد الزيادات اللي عملتها الحكومه في السعر , من سنتين كان الاردب بحوالي 200 جنيه, والفدان كله علي بعضه مش بيجيب أكتر من عشره أردب يوم ما تكون الارض عفيه ومافيهاش غلطه
.
اه نسيت أقول الفلاح هوه اللي بيحصد القمح وهو اللي بيدرسه يعني بيطلع الحبوب في جنب والقش في جنب في عمليه مرهقه ومكلفه ماديا ده في حالة أنه يبيع القمح بالأردب ويوردوا للقمح
أما في العرض التاني الفلاح مش مطالب بأي حاجه من الحاجات دي
الناس هاتيجي تاخد القمح اخضر
.
المشكله كلها أن الحكومه من سنتين رفضت تستلم القمح من المزارعين وقرروا أنهم يستوردوا القمح من بره
القمح أيامها كان الفلاحين بيأكلوه للحيوانات اللي مربينها في الغيط
.
الحكومه وفرت في السنه دي حوالي 2 مليار جنيه
.
السنه اللي بعدها
أكيد الفلاحين أحجموا عن زراعة القمح وأتجهوا لمحاصيل أخري
والحكومه كانت بتشجعهم علي كده
الانتاج المحلي من القمح كان قليل جدا
.
سعر القمح في البورصه العالميه زاد بشكل رهيب في السنه دي
السكه اللي الحكومه ماشيه فيها بتدل أنها حكومه غبيه ومستبده
في الحاله الراهنه
الغباء جريمه تفوق الاستبداد بمراحل
مفيش أي حكومه تانيه عملت اللي الحكومه دي بتعملوا فينا
.
جمال عبد الناصر
الارز ثمنه أرتفع قرش صاغ
الوزاره أقيلت
.
السادات
مع أنه سبب البلاوي اللي أحنا عايشين فيها دلوقتي
أستجاب للناس في يناير 77
واسعار السلع الغذائيه رجعت تاني زي ما كانت قيل يناير 77
المهم الناس هم اللي أجبروه أنه يرجع الاسعار
.
مبارك
الاسعار في ازدياد
الدعم علي السلع الاساسيه يلغي بالتدريج
دعم المصانع والشركات الكبري يصل الي 40 مليار جنيه في السنه
الدين الداخلي يزيد علي 950 مليار جنيه مصر
الدين الخارجي أنا مش عارف أي حاجه عنه ومش عارف أي حد يعرف أي حاجه عنه
27 سنه طوارئ
الحكام اللي حكموا مصر أشتركوا كلهم في الديكتاتوريه بس أختلفوا عن بعض في درجة الذكاء والوطنيه
والشعب نفسه أصبح أكثر جبنا
.
في ناس بيقولوا أن الاسعار زادت علشان الدعم بدأ يتلغي
أنا مع الغاء الدعم ولست ضده
ولكن
ألغاء الدعم يحول السوق المصري الي سوق رأسمالي صرف
ويلغي عمل الاقتصاد الموجهوألية ضبط الاسعار
هذا في ذاته ليس به مشكله
المشكله هي الأزدواجية
بينما تريد الحكومه تحويل السوق الي سوق راسمالي
يظل نظام التعامل مع المواطنين وبالأخص المواطنين العاملين نظام الاقتصاد الموجه
مرتب الشخص الذي يعمل لدي الحكومه يتراوح مابين 150 جنيه في بداية التعيين الي1500 للشخص ذو الكفائه المرتفعه للغايهبعد نهاية المشوار وبعد أن يكون هذا الشخص يملك من الخبرات اقصاها ومن المناصب أرفعها
جيد
في الولايات المتحده (نظام رأسمال صرف) المرتب السنوي للمدرس 25000$ نعم خمسة وعشرون ألف دولار امريكي
وفي أنجلترا ما يعادل هذا الرقم
ممن الممكن أن نقارن بين الرقمين وأن نتوقع أن هناك طريقة ما للتوفيق بينهما
كلمة السر في هذه المعضله هي النظام الاقتصادي للدوله
فاذا كنا في ظل نظام أقتصاد موجه شامل ومتكامل فالرقم الاول مناسب جدا
أما اذا كنا في نظام راسمالي
فالرقم الثاني هو المناسب
لذا لا يستقيم الحال أذا بدلنا المواضع فأصبح الامريكي يحصل علي 150 شهريا
هذا ما تحاول حكومتنا الغبيه أن تفعله
تحاول أن تحول السوق الي سوق حر يخضع لقانون العرض والطلب
وفي نفس الوقت يظل المواطن الذي يعمل لديها خاضع لقوانين الاقتصاد الموجه
وهذا ما يعجل بسقوط هذه الحكومه بل وسقوط النظام كاملا اذا ما لم يتداركوا الوضع السئ للغايه في مصر
الكلام اللي فوق ده أنا اللي كاتبه
ممكن تلاقوا فيه غلطات بس والله مش بقصد أي غلط أو خطأ
نرجع للسؤال اللي أنا كنت كاتبه
أحنا رايحين علي فين؟
لو راجعنا كل الظروف والملابسات هانلاقي أننا أصلا مش عارفين أحنا رايحين فين بالظبط
فيه تخبط في الدوله
الحكومه بتتخبط في قراراتها وشكلها هاتتخبط علي دماغها قريب
والشعب مش لاقي قائد يجمعوا حواليه
ودي المشكله
المشكله أن الشعب علي وشك القيام بثوره ولو الثوره دي أنطلقت بدافع الجوع والغضب فلن تحقق الا الدمار والتخريب والاهلاك
المشكله الاكبر ان الثوره دي لازم تقوم ده من قراءة الاحداث
الاحتجاجات موجوده في كل مكان فيكي يا مصر
الناس بدأت تتكلم
في فئات كانت مستئنسه سمعت كلامهم قريب
ناس مستحيل تصدق أنهم عندهم الجراءه والقدره علي الغضب والاحتجاج
الناس دي بدأئت تحتج وتتكلم
أنا شفت نموذج من الناس دي بعيني
ولولا كده ماكنتش صدقت
الثوره جايه جايه
وتحتاج الي قائد يوجه مسارها
والقاده أو الذين يصلحوا أن يكونوا قاده في عصرنا الحالين علي ثلاث أحوال
أولهم في المعتقل
وثانيهم في قفص الحكومه الذهبي
وثالثهم معتزل الحياه
أحنا رايحين علي ضباب
أقوي ناس في الشارع دلوقتي واللي ممكن يوجهوا الناس هم الاخوان
المشكله أن فيه ناس مش بتثق في الاخوان
الفصيل التاني اللي ممكن يحقق التوازن مع الاخوان في الشارع السياسي تم اعدامه في صراعات جانبيه أستهلكت ما له من قوه ورصيد في الشارع المصري
ولكن
هل يستطيع الاخوان السيطره؟
هل فعلا يقدرون علي التفاهم مع الشعب الساخط وتحقيق مطالبه؟
الجيش , ما موقفه من الاحداث الجاريه؟
ما موقفه من الاخوان؟ علما بأن هناك أخوان في الجيش
أعتقد أن مستقبل هذه البلاد سوف يكون لمن يملك القدره علي الاستفاده من اللحظه الحاسمه التي بأذن الله سنراها قريب
حاسس أن أنا طولت قوي عليكم
وحاسس كمان أني مقدرتش أشرح كل اللي أنا عايزه واللي شرحته مقصر فيه
فياريت تسامحوني علي وجع الدماغ اللي أنا كاتبه فوق ده
