Wednesday, March 5, 2008

حسبي الله ونعم الوكيل

في ألأول أنا أسف لأني مش برد علي تعليقاتكم ولأني مش بزوركم
بس ده غصب عني بعيد عندكم كان ورايا الاحد اللي فات تسليم ريبورت وكان لازم أعمل الريبورت ده
ويوم الاتنين كان ورايا أمتحان ميد ترم
ويم الجمع ورايا امتحان ميد ترم
ويوم الاحد اللي جاي ورايا أمتحان ميد ترم وتلات ريبورتات عايزين يتسلموا
ياريت تدعولي وبالتأكيد هاتعذروني
المهم
أنا أصلا ماكنتش هادخل الا لما أخلص الامتحانات اللي ورايا
ولكن
يوم الاحد اللي فات أخواني في الجامعه عملوا مظاهره جميله ورائعه ومتحضره تضامنا مع غزه
المظاهره مرت بسلام مع كم عربيات الخوف المركزي ييييه قصدي الامن المركزي اللي كان محاصر الجامعه
أنا أفتكرت أن الجامعه بتاعتنا أسرائيل أحتلتها وعسكرت داخل أسوارها
المهم
أخوانا عملوا حركة رجوله وأتصلوا بالست أم نضال (أم الشهداء )ليها لواحدها 3 شهداء
والناس كانوا متحمسين جدا (كانوا عايزين حد يقولوهم الي الباستيل يا رجال قصدي الي مصر الجديده يا رجال)وبعدين أخواني عملوا مسرحيه جميله جدا
ولموا التبرعات
وأنتهت المظاهره علي خير
عدينا اليوم ده
امبارح
كان فيه مظاهره تانيه داخل المدينه الجامعيه
المدينه كانت محاصره بحوال 20 عربية خوف مركزي تاني قصدي يا جدعان أمن مركزي
ومكانش حد بيخرج من المدينه امبارح حتي الناس اللي كان وراهم كورسات أتصلت بالمعيدين وأعتذرت ليهم
المظاهره دي كانت قويه بجد
وكانت برضه تضامنا مع غزه
عدينا امبارح
النهارده بقي
أروح الكليه وأجي ألأقي طن الحديد وصل 6100 جنيه مصري
يا سنه سودا أستغفر الله العظيم
أنا أفتكرتها أشاعه وطلعت علشان تشوه سمعة أبن العز أحمد عز
المهم
في حد بثق في كلامه أكد لي المعلومه دي
يا خراب البيوت المستعجل
بصراحه أنا تعبت من جوايا
ايه ده اللي بيحصل
وصلت لكده
البلد كلها تبقي بتغلي علشان خاطر غزه وعلشان خاطر الغلاء وعلشان وعلشان وعلشان
وييجي أحمد باشا عز يغلي الحديد ويوصل بسعره ل 6100 جنيه
أنا مش عارف أعبر عن اللي جوايا
كل اللي جوايا دلوقتي أن حوالي 80 حرفه متركزه في قطاع المقاولات أتخربت بيوت الناس اللي شغالين فيها
يعني علشان السيد أحمد عز مشغل عنده 7000 واحد ومخليهم عايشين كويس يقوم يقضي علي 70 مليون واحد
طيب
السعر العالمي للحديد بتاريخ واحد مارس
يتراوح مابين 338$الي 387$أمريكي
اللي عايز يتأكد
هاتلاقو في الموقع ده أسعار الحديد من 2001
طيب الفرق ده بيروح فين
أنا صدري مغلول
عايز ألعن الحكومه
بس مش عارف
أنا مش عارف أنتوا حاسين باللي جوايا ولا لأء
بس بالله عليكم اللي قلبه محروق زي قلبي
يدعي عليهم
في حراميه كتير قوي في مصر
بس السرقه المره دي تخطت جميع الحدود
المشكله أن الحكومه نفسها واقفه ومش قادره تتكلم
مع أن الحكومه هايتخرب بيتها والمشروعات اللي الحكومه بتقوم بيها دلوقتي هاتقف
وده كله لأجل أن تزيد مفاتيح كنوز قارون مفتاحا
ونحن
في سلبيتنا غارقون
فقد كمموا الافواه
وأغشوا الابصار
وأصموا ألأسماع
قال تعالي في كتابه الكريم
أن فرعون علا في الارض وجعل أهلها شيعا
صدق الله العظيم
أنا أسف جدا
وحسبي الله ونعم الوكيل

5 comments:

Anonymous said...

أعانكم الله ووفقكم وثبتكم ونفع بكم وغير بكم إلى الأفضل إن شاء الله

ولكن أخي الكريم لماذا ألمح يأسا بين سطوركم؟ لماذا لم تكمل ما حدث لفرعون وهامان وجنودهما؟ التغيير ليس بعيد المنال، وليس مستحيلا، صحيح أنه صعب، وأنه شاق، ولذلك هو طريق الرجال، الرجال من أتباع محمد صلى الله عليه وسلم.

أخي الكريم: إن أول مكسب للفساد في مواجهته مع التغيير والإصلاح هي حالة اليأس التي قد تسيطر على رجال الإصلاح في منتصف الطريق، فانفض عنك ما أنت، وكلما ازداد الليل سوادا ازدد أنت أملا واستبشارا، فإن أشد ساعات الليل حلكة تلك التي تسبق الفجر

جزاكم الله خيرا والسلام عليكم ورحمة الله وبركاته


شهاب الأزهر

oceaneyes said...

والله ما عارفة اقول ايه

!!!


حسبى الله ونعم الوكيل كفاية بجد

Wish I were a Butterfly ... said...

حسبي الله و نعم الوكيل

ربنا يوفقك في امتحاناتك و مذاكرتك

سلام عليكم

Unknown said...

وقال تعالى ايضا
استخف قومه فأطاعوه



حسبنا الله ونعم الوكيل
مش فيهم
لا
فينا
لاننا رضينا ان حد يستخف بعقولنا
ويذلنا

Empress appy said...

ايه مين دول اللى بستخفوا بعقولنا لا بص احنا ركنا عقولنا شويه علشان البنزين غلى تركن معانا
ربنا يقوينا ونتحرك بقى