كنت أنا وجماعه أصحابي في الهرم امبارح
وأحنا مروحين خرجنا من عند البوابه اللي عند مسرح الصوت والضوء
المهم
بعد ما وقفنا شويه حلوين يجي نص ساعه كده الحمد لله فيه أتوبيس رايح الجيزه السواق تعطف وتكرم ووقف
ركبنا الاتوبيس
كنا ست شباب زي الورد
المهم
ركب معانا اتنين من ايطاليا
زي ما عرفنا بعد كده
المهم
اتكلمنا أحنا السته معاهم
وقعدنا نهزر
بعد شويه
هجم علي الاتوبيس التتار
المصريين اللي بجد
وبقي الاتوبيس مفيش فيه موضع قدم زي ما بيقولوا
المهم
بنتكلم مع أصحابنا الاجانب بالانجليزي
لقينا بقي الكلام
.
بلدنا دي أحسن بلد في الدنيا
.
اللي مش عاجبه من الكحل ما يتكحلش
.
.
.
.
الي أخر القاموس
أنا بصراحه أتخنقت
وكل ما أرد عليهم وأقول كلمه أصحابي يلغوشوا عليا
.
خايفين عليا
بصراحه انا تعبت أمبارح جدا من الناس الغلابه اللي مش لاقيين لقمة العيش وبيقولوا علي بلدهم أحسن بلد
الناس اللي ركبوا أتوبيس كان عامل زي علبة السردين
ومش عاجبهم أننا نتكلم
المهم
كان اليوم هايعدي علي خير لولا أننا كنا عايزين نروح سينما
طيب هاندخل فيلم ايه
أتفقنا ندخل الجزيره
طيب
ركبنا المترو وقلنا هانلاقي الفيلم ده في سينما روكسي
روحنا روكسي والفيلم مكانش موجود
فقمت أتسحبت من لساني وقلت يلا نروح سيتي ستارز
وياريتني ما قولتها
روحنا سيتي ستارز لقينا المول مش عارف حجمه أتضاعف
مفيش مشاكل
دخلنا المول
بصراحه
منظر البشر اللي جوه المول أستفزني جدا
ناس نضيفه
بجد
ما ركبوش مواصلات قبل كده
المهم
رحنا ركن السينما
التذكره 25 جنيه
مفيش مشاكل
ادينا الفلوس لواحد مننا علشان يقطع التذاكر
بصراحه
لما ندفع 150 جنيه علشان نتفرج علي فيلم
صعبه قوي
فصاحبنا عمل حوار علينا والمهم مشينا
بعد ما قولت أنا مش هادخل المكان ده تاني غير لما أكون حرامي
مشينا بعد ماعرفت أن البلد دي مش بتاعتنا
وكل اللي أنا عايزه
أنهم يسيبونا
دعونا
دعونا نقتل أنفسنا
دعونا نلاقي منيانا
دعونا نريحكم منا
دعونا نحمل أسيفنا
ونرجم أشعارنا
ونهجوا ألسنتنا
ونرقد وتذبح أعناقنا
.
فلسنا لكم الا كمثل الرزق لقارون
وأنتم لنا أسيادنا
فلن نتبقي الا كما أردتمونا
.
ولن تتبقوا الا كأصنام الهه
.
وقال الرسول لقد يئس الشيطان أن يعبد
ولكننا عبدناه
سننا له القانون
وتعدينا لأجله علي الدستور
.
وكل ما فعله
أنه يمارس حقه
.
ونحن
صامتون
.
واذا تكلم أحدنا
ففي جهنم الدجال يشوي
فقط
لأنه تكلم
.
وتخرج نشرة الأنباء
تمجد في المسيخ الدجال
تقول أنه أعظم الرجال
وأحكم الرجال
.
بينما الذي تكلم
فقد كفر بالأله
ومن كفر يقتل
كما قال أئمة الفقهاء
.
ولا يهم
من يأخذ العزاء
في وطن علي وشك الفناء
في حلم
في أمل
في كل أسباب البقاء
لا يهم
.
لا يهم
سوي أن تزيد مفاتيح الكنوز
مفتاح
.
لا يهم
سوي أن يبقي المسيخ الدجال
ويحكم ولده مقيدا الجميع بالأغلال
رافعا كل شعر الرزيله
مشيدا أعظم صروح الضلال
.
لا يهم
.
فنحن جامدون
ميتون
والبعث لا يأتي سوي يوم الحساب
.
لا يهم
فالتغيير لا يتأتي بالكلمات
وأسقطنا من لغتنا جميع الفعال
.
لا يهم
13 comments:
السلام عليكم
انا جيت اولا اشكرك لزيارتك الجميلة لمدونتى ولونها متاخرة شوية معلش ظروف النت عندي سيئة للغاية
انا جيت مدونتك لفت نظرى ان حضرتك من بلطيم
انعم واكرم
عندي احساس انك وصلت لمدونتي بطريق الكرامة اصل عندي قناعة ان اهل بلطيم كلهم في الكرامة :D
تشرفت بمعرفتك ةوأحلى تحية
لي عودة
بص يا أخي، انا أول مرة ادخل المدونة دي، جميلة وربنا يباركلك فيها وفيك.
في كلمة استفزتني في مقالك الأخير وعايز اعلق عليها ويا رب تكون عندك حسن استماع.
"البلد دي مش بتاعتنا" ... لية يا أخي كدة؟ لأ دي بتاعتنا كلنا، ومش معنا انك متقدرش تدخل سيتي ستارز وتاكل أو تشرب في افخر المحلات، مش معناه انك ملاكش لازمة في البلد. انا باروح سيتي ستارز مع اسرتي كل اسبوع وباكل اللي أقدر أسعد بية اسرتي، وكمان بأشتري اللي اقدر علية من هناك، وعندي عربية وبقالي 30 سنة ماركبتش مواصلات، وفي ملايين غيري ليهم نفس الظروف، يبقي معني كدة ان البلد دي بتاعتنا احنا بس والباقي لأ؟؟
أنا علشان اوصل المستوي ده سفيت التراب 25 سنة شغل، 15 ساعة كل يوم، خدت كورسات في كل العلوم اللي تخدمني بداية من لغة أجنبية وكمبيوتر لحد علوم ادارية معقدة... الخ
الشيء اللي عايز انصحك بيه (معرفش سنك كام ولو انو مش مهم)، علي أد ما تجتهد في حياتك علي أد ما ربنا يديك ويسعدك، وعلي أد ما تسعي تكون أحسن ربنا حيخليك أحسن، لكن لو تواكلت أن الحكومة حتساعدك يبقي ماتشتكسش لغير اللة.
يا رب أكون قلت حاجة تفيدك، وربنا يباركلك.
انت اصلا غلطان
بتروح سيتي ستارز ليــــــــــــــــــه؟
وبعدين انت قلت المكان دة مش هدخله تاني لمجرد تذكرة السينما؟
اومال يا راجل لو كنت دخلت المحلات وشفت الاسعار كنت هتعمل ايه؟
بيتهيا لي كنت انتحرت جوة سيتي ستارز احتجاجا على وجود هذا المكان من اساسه
تحياتي
اميرتي
أميرة ويلز
بالتأكيد شرفتي ونورتي المدونه
وأنا ليه الشرف أني أكون من بلطيم
بس مش بلطيم كلها في الكرامه زي ما انتي معتقده معظم الناس هنا بتحب الاستاذ حمدين جدا وفيه ناس تانيه مش مقتنعه بيه
أنا شخصيا بموت فيه
نورتي كمان مره
تحياتي
استاذي
صاحب وجهة نظر
في البدايه أشكر كلماتك وربنا يباركلنا في عمرك
بالنسبه لكلمة البلد دي مش بتاعتنا
أنا قولت الكلمه دي من كمية المراره اللي كانت جوايا
حضرتك متخيل التناقض اللي انا كنت واقع فيه
من أتوبيس من أبو خمسين قرش لسيتي ستارز
حضرتك حاسس بالفجوه الموجوده مابين الحاجتين
حضرتك للعلم أحنا الحمد لله ظروفنا كويسه جدا جدا جدا
يعني أنا عندي البيت بتاعي وعندنا بدل العربيه اتنين
بس أنا والدي عودني من زمان أني أعتمد علي نفسي وأعرف قيمة القرش
حضرتك أحنا بنروح سيتي ستارز كتير
وكل مره الموضوع بيبقي عادي بس المره دي أتصدمت
حسيت فعلا بالفرق
الفرق مابين الناس اللي ممكن يقفوا يستنوا الاتوبيس ساعه علشان مفيش معاهم فلوس يركبوا ميكروباص والناس اللي مفيش في دماغها اي حاجه
يارب تكون فكرتي وصلت يارب
علي فكره انا 21 سنه
وفي كلية هندسه
وكلام في سرك مش بدرس وبس انا الحمد لله بشتغل في الصيف مع اننا مش محتاجين بس أتعودت علي كده من وأنا صغير
ياريت ماتكونش زعلان مني ويارب تكون مقدر الحاله اللي أنا كنت فيها
أنا عارف أن فيه ناس شرفا كتير وأنا مش بقصد أي حد منهم
تحياتي
زعيم حزب الاغلبيه
نورت المدونه ياباشا
وموضوع سيتي ستارز كان وزة شيطان نعمل ايه بقي
المشكله بالنسبه لي مكانتش في الاسعار
المشكله كلها اننا كنت لسه نازل من اتوبيس نقل عام وشايف البشريه شكلها عامل أزاي
وبعدين أنا انتحر وأدخل النار ماينفعش
:):)
تحياتي
بص يا شارد، أنا أؤمن ان الأنسان هوا اللي بيعمل نفسة، حتي لو كان عند والدك فلوس كويسة تعيشك كويس لو معملتش نفسك حتضيع. أنا بنصح ولادي بنفس النصايح، بقولهم عمر ما في نعمة ممكن تدون طول العمر، اللي بيدوم هو مجهود الشخص وقدرتة طول ما ربنا مديلة امكانيات عقلية.
طبعا ربنا خلق الناس مختلفة، كل واحد شايف سكتة حسب عقلة، في ناس راضية وساكتة (بمعني متواكلة) وفي ناس بتسعي بكل امكانياتها علشان تبقي أحسن واللة سبحامة وتعالي هو الموفق، اسعي يا عبد وأنا اسعي معاك.
اللي عايز أقولوا، متضيعش لحظة من غير متحاول تحسن علومك وحياتك ومستقبلك، حتندم لو الوقت دا ضاع، ودلوقتي الدنيا بقت مفتوحة علي العلم والمعرفة، دنيتنا احنا كانت مقفولة بس اللي مضيعهاش حقق اللي هوا عايزة، دا الكلام اللي بقولوا لولادي ولكل الناس ربنا يهدي الجميع
السلام عليكم و رحمة الله و بركاته
فى البداية اعتذر الشارد لانى من فترة لم ادخل للمدونه و لم ادخل لمدونتى أيضا ..
لكن موضوعك جميل بس اخالفك فى اشياء
البلد دي لو مش بتاعتنا .. هتكون بتاعة مين .. هنسيبها لمين لليهود و لا للامريكان
البلد دي بتعاتنا احنا و احنا الى المفروض نصنع قرارنا ... ربنا يسير ان شاء الله كل الاوضاع تتصلح
لازم نكون عندنا انتماء .. دى غالية عليا جداااااااااااااااا جدااااااااااا هنعيش و نموت نحبها و هنعيش ونموت و احنا اولادها ...مش هنتركها لغيرنا ... اتمنى مش تزعل منى على كلماتى
معلش انا مش معاك هو سيتى ستارز برضه فيه ناس بتركب مواصلات عادى بما انى كنت ساكنه جنبه غير كده مش هدافع واقولك شوف وسط البلد وسينماتها وقله الادب اللى بتحصل فيها وشوف سينمات سيتى ستارز وجنينه وطيبه عموما السراج مول ارخص
بص احنا شعب طيب بس سلبيتنا موديانا فى داهيه بجد
بلد الفرنجه
كلمه قالها الزعيم
بسبب حالة غريبة ومش كويسة أوي بمر بيها في الوقت الحالي...فسامحني لأني مش عارفة أقول اللي في دماغي كويس. بس ممكن أقوللك إن رأيي زي معظم اللي كتبوا، و زي "وجهة نظري" أكتر
معاك في إن بأة مفيش وجود لحاجة اسمها الطبقة الوسطى... و بأة يافوق أوي ياتحت أوي..في الأماكن و المحلات و الخدمات و حتى المناطق السكنية، بس دة مش معناه إنها مش بلدنا
والله فاهمة اللي انت تقصده بس أنا مش عارفة أقول اللي عايزاه كويس
بعدين أنا يومها كنت مع عائلتي هناك :). تفتكر إحنا من الناس الغريبة اللي من عالم تاني اللي انت شفتها؟
:)
تحياتي لكتاباتك الجميلة و تفكيرك الناضج
وسامحني لأن تركيزي "صفر" حاليا :)
عندك حق فى ان الحالة فى البلد دى بقت تصعب على الكافر
وفعلا انا لا اعتقد ان فى دلوقتى طبقة وسكة بالمرة ...هما يا أغنياء اووى يا اما فقراء اووى
بس ده لا يمنع ولا ينفى حقيقة انها بلدنا ..واحنا عايشين فيها ..ومافيش فى ايدنا شىء لتغير اى حقيقة فيها ..لان عندنا خوف من كدة
او جايز بقى عادى عندنا نشوفها كدة
...
الله اعلم
وما ينفعش تقول انها مش بلدنا لمجرد ان وضع فيها مش عاجبك ..دى بلدك ..وانت عايش فيها
ولو على المستويات العالية اوى ..فى ايدك انك تكون زيهم ..بإرادتك واصرارك وغير كدة بإيمانك بربك وبقدراتك
لكن نظام اليأس ما ينفعش
ده رأيى
الشعر جميل قوي
و الناس الغلابة غلابة فهمهم على قدهم
أما الناس بتوع المول
فلو فلوسهم حلال ربنا يبارك لهم
أما لو حرام ربنا يحرقهم
Post a Comment