شوية غم 31 سنه علي ثورة الجياع 19 -1-1977

في الاول أنا بعتذر للناس كلها علشان غيابي عنهم بس والله غايب غصب عني

بعيد عنكم ورايا أمتحانات

المهم

أنا أصلا ماليش نفس للحياه من الاساس

وازاي أصلا أي حد يكون ليه نفس بعد ما الحكومه الرشيده بتاعتنا رفعت سعر المازوت للضعف في يوم وليله

تعرفوا ان رفع سعر المازوت أثر تقريبا علي كل حاجه

طن الحديد بقي ب 5000 جنيه مصري فقط

الطوب بقي ب 320 جنيه بعد ما كان ب 220

الاسمنت عدي ال 400 جنيه

يعني الحمد لله قطاع العقارات في مصر أتدمر

يعني أكتر من مليون عامل بيشتغلوا في القطاع ده بقم والحمد لله عاطلين

ده غير طبعا القطاعات المساعده

يعني النقل والموزعين الفرعيين لمواد البناء و.....و...و

ده غير ان الشباب معدش قدامهم فرصه انهم يحلموا أنهم في يوم من الايام يخطبوا ده بعد ما جرام الدهب 24 قيراط عدي 155 جنيه

مش لازم يجيبوا دهب طيب شوفوا الشقق أسعارها هاتوصل لكام

يعني الحمد لله اللي أتجوز يبقي نفد بجلده

واللي عنده شقه بقي عنده كنز

ده بعد 31 من انتفاضة الشعب ضد الغلاء

أعتقد أنهم بالمقارنه بالوقت ده كانوا مرفهين

بس هما كانوا رجاله

كانوا عارفين يقولوا لاء

كانوا يقدروا ينزلوا الشارع

كانوا بيهزوا ويزلزلوا قصر العروبه

انما أحنا

؟؟؟؟؟؟؟؟؟؟؟؟؟؟؟؟

اسف للغم ده

بس ده مش ولا حاجه جنب البلاوي اللي الخكومه الرشيده عاملاه بره

السيد الوزير أحمد أبو الغيط مستكتر علي معارضه ب 45% تلت مقاعد الوزاره +1

السيد الوزير تقريبا مش بيقرأ

علشان لو بيعرف يقرا كان قرأ ميثاق العيش المشترك

اللي حتي الدستور اللبناني أقر بيه في أول مواده

تقريبا برضه والله أعلم انه كان فاكر أنه بيتكلم عن مصر

مصر اللي جماعة الاخوان ممثلين في البرلمان ب88 عضو بعد التزوير

مش معترف بيها

مصر اللي فيها لجنه أسمها لجنة الاحزاب كل مهمتها أنها تمنع الاحزاب الجاده

مصر اللي مابقاش فيها حد يقدر يرفع صوته

علشان كلهم بقيم في المعتقلات

مصر اللي الشرطه فيها ولا بلاش علشان معنديش تعبير محترم يناسبهم

مصر اللي جمال عبد الناصر قال فيها أرفع رأسك يا أخي

دلوقتي بقيم بيسجدوا لألههم اللي في البيت الابيض

الاستاذ هيكل بيقول عليهم ملوك وعمال ونواب الامبراطور

أنا بقول أنهم عبيده

واقول ليه يا مصـر ولادك كـده

يا إمـا المذله يا يتـجبـروا

يا خوفـي يا فـرحة قـلوب الـعدا

ويا نـدمـي لو ما يتغيـروا

عمي صلاح جاهين

بحبك أوي يا مصر

ونفسي ترجعي تاني مصر

عبوديه

معلق في رقبتي

ثائري

حقدي علي عدوي

ذلي

يملؤ كياني

ألمي

أري ملء عيني

مقتلي

بيد عدوي

مصيري

يملك أقداري

غيري

.

.

.

كالعير يسوقوني

حارب

طبع

أسلم

أكفر

واذا عارضت

أخون بلادي

وبلادي هي حكامي

وحكامي محكومين

من أسياد أخرين

ببلاد أخري

وألاسياد هناك عبيد

والعبيد هنا أسياد

يسودون ذئابا سود

وذئابهم تنهش لحمي

نار تعتمر في صدري

أدفعهم

لا يذهبون

تثور ثائرتي

يتزايدون

يحكمون الخناق علي

أترك لهم نفسي

منتحرا

أو ربما شهيد

ويأتي صوت من بعيد

صوت عبدي

الذي أصبح سيدا للذئاب

أخرج نفسك من هذا العذاب

ماذا أفعل؟

اركع......أذعن

ولا تكثرن من الغياب

في الذهاب

الي مقر الذئاب

والا؟

سأريك من الانياب

واذا فعلت؟

ستكون عبدا للذئاب

اذا

أخرجوني من هذه الغاب

الذي أصبح فيها السيد

عبدا للذئاب

موجز الانباء

أخوانا الطلبه في الجامعه عندنا بعد مظاهرة يوم الجمعه قرروا يعملوا حاجه جميله جدا

تعرفوا هيا ايه

أعتصموا امام مبني الاداره

وصلوا جماعه

صلوا لربنا وطلبوا من ربنا مش من مخلوق زيهم

وان شاء الله ربنا هايكرمهم

الفيديو ده مش هاتلاقوه في حته تانيه

لأخوانا المعتصمين وهما بيصلوا

ياريت تدعولهم

ودي صور رائعه ليهم

ياريت نتضامن معاهم

لأنهم المره دي ما غلطوش وعملوا الاحتجاج بشكل حضاري ومحترم

ونعمل حاجه هما يحسوا اننا واقفين جنبهم من خلال هذا العمل

انا مش عارف ممكن نعمل ايه بس بالتأكيد في حاجه ممكن تتعمل

ربنا معاهم

أه علي فكره انا مش من الاخوان وكتير كنا انا وأصحابي الاخوان بتناقش بصوت عالي

لاني بحب عبد الناصر وطبعا انتوا عارفين ان بينهم (الاخوان والناصريين ) ما صنع الحداد

بس المفروض المبدأ لا يتجزء

تحياتي للجميع

مظاهره بجامعة الازهر بسبب اعتقال 25 طالب

النهارده كان فيه مظاهره عندنا في الجامعه
انا شفتها بالصدفه وانا معدي رايح العباسيه (أصل القسم بتاعي هناك ) وللاسف كان ورايا امتحان فما قدرتش انزل اشوف فيه ايه
المهم طبعا الجامعه عندنا مافيهاش اي طلبه ناشطين غير طلبة الاخوان المسلمين
علي العموم انا رحت القسم وسألت زمايلي عن اللي حصل

تخيلوا ان الامن أعتقل 25 طالب من زمايلنا
اتخطفوا يا عيني من قلب الشقق اللي واخدينها مع بعض

انا ما صدقتش فاتصلت بواحد صاحبي بس صاحبي اوي هوا من الاخوان
وسالته قاللي انه من يومين اخوانا الطلبه تم اعتقالهم
والمظاهره دي كانت علشان كده

وطبعا ده بالاضافه للمارسات البشعه اللي بيقوموا بيها (الامن طبعا) من كسر الشقق والتثييت
يعني يحط السلاح علي دماغك وما يخليك تتخرك خالص


المثير انهم السنه اللي فاتت عملوا نفس الموضوع
بس كانوا خاطفين اكتر من 150 طالب من المدينه ده غير الاقتحامات اللي حصلت للشقق
http://moon-eng.blogspot.com/2006/12/blog-post_14.html

والحمد لله أنهم ناويين يقننوا وضع الطوارئ زي ما الدكتور مفيد شهاب بيقول
قال بالنص ( ان قانون الارهاب تم وضعه لكي يتم تقنين وضع الطوارئ) وبعدين

وعايزينا نكون محترمين مع ان النظام كله علي بعضه مش محترم
نظام جبان خايف من شوية شباب زي الوردعلشان بيتكلموا
طيب لو بقي فيه فعل النظام هايعمل ايه
أعتقد انه ساعتها مش هايكون ليه وجود


بلاش كلام لحد كده
أتكلمنا كتير
وسكتنا كتير
واكتر شئ
اننا كلنا سلبيين

اجازه

بما اننا في فترة امتحانات
فالمفترض ان اخنا يجب علينا اننا نذاكر
وعلشان نذاكر المفروض ها نعتذر منكم لفتره من الزمن
لحد لما الامتحانات ما تخلص

ياريت تقبلوا اعتذاري واعتذلر جميع اخواني الطلبه الغلابه

وياريت تدعولنا بالتوفيق

وأهم حاجه
تعالوا زورونا
وبلاش تنسونا

وخلوا قلوبكم معانا زي ما قلوبنا معاكم


حبي للجميع

متنافضات

الموت كالحياه

ولكن كل ما هناك

أن الموت جنة أو نار

بينما الحياه

بمجملها نار

أصدقائي

انا كتبت الموضوع ده قبل كده في المدونه عندي

بس حاسس اني لازم انشره تاني

علشان احنا( قصدي أنا والبني أدم اللي هوه صاحبي) بعاد عن بعض شويه

بقالنا كتير ماشفناش بعض

بعيد عنكم الدراسه واخدانا ومطحونين

وللأسف أنا مفتقده بشكل صعب

واحشني يا زفت وعايز اشوفك

أه اسيبكم تقروا

اروع ما في الحياه ان تعيش وحولك من الاصدقاء ما يكفيك لتصبح حياتك بوجودهم هي الحياه وبدونهم تصبح كالموتي
اصدقائي هم اروع البشر في نظري انهم ملازي وحصني انهم من يخفف عنا اثر صدمات الحياه
هم كل ما لدي من الدنيا لولاهم لكا كتبت هنا ولولاهم لما كنت في الاساس هنا انه التحدي النابع عن الحب
تحدي جميل من منا الذي يدرك اكثر من الذي يمرح من اكثرنا معرفة بالجنس الاخر
نحن كيان واحد متعدد الاعضاء كل منا يكمل الاخر كل منا يحب الاخر
انهم اصدقائي وانا صديقهم فنحن في تماسكنا كقطعه من الماس وفي توجهاتنا كفروع الشجر كل منها له اتجاهه ولكنها تبقي منتميه لنفس الكيان
فكياننا هوه المسيطر وليس توجهاتنا فعندما نمرح سويا لا تكاد تسمع سوي ضحكاتنا وعندما نتناقش لا تشعر الا بلهيب كلهيب الشمس
نحرق انفسنا دفاعا عن افكارنا كل في مواجهة الاخر وتبقي بيننا الكلمه الشهيره
(الاختلاف في الراي لا يفسد للود قضيه )
هي الفيصل والحكم
وفي مواجهة الاخر ترانا مدافعين عن بعضنا

فالصداقه هي حاله عجيبه تربط الانسان باخرين علاقه فيها كل ما في الحياه من مشاعر
فيها الحب وفيها الغيره وفيها الحياه وفيها الموت
علاقه تجمع كل المتناقضات ولكنها ام العلاقات فالحب مبني عليها والكره مبني علي عدمها
الصداقه مشروع حياه مثله مثل الكليه مثل العروسه مثل الوظيفه
بيتبني عليها اشياء كثيره
ولكن الخيانه في الصداقه تبقي الاكثر مراره


اصدقائي ليهم مواقف كتير حلوه بس المشكله اننا عايزنها حلوه علي طول مش متوقعين اي حاجه غير كده
علشان كده لما بيحصل موقف ولو حتي صغير تلاقي نفسك بتنسي كل الحاجات الحلوه اللي عملتوها مع بعض
بتنسي انك اول ما شفتها جريت عليه تقوله عليها بتنسي انه ظبط مع واحده صاحبتها بس علشان خاطر سيادتك تكلم الاخت بتاعتك
بتنسي مشاوير الصياعه مع بعض بتنسي انك اول ما بتقع في مشكله هوه اول واحد بيقف وياك وأول واحد انتا بتقوله علي المشكله دي

نسيت يوم ما كنتوا بتتكلموا عن عبد الناصر وانتا متشنج عليه وهوه متشنج عليك اصل هوه مش بيحب عبد الناصر وبيحب السادات
وانتا بتموت في عبد الناصر وشايف ان السادات هوه اللي خرب مصر
وفي الاخر ضحكتم انتم الاتنين ولا انتا اقتنعت برايه ولا هوه امن بفكرك
نسيت لما كنتم بتسمعوا فيروز واصاله ومنير وعمرو خالد
بتنسي لما بيجيله تليفون من حبيبته وانتا قاعد تغلس عليه وهوه عايز يموتك
بتنسي انك لما عرفت ان البنت اللي انتا عايزها اتخطبت هوه اول واحد رحتله وهوه اللي طلعك من الحاله الزفت اللي كنت فيها
بتنسي لما حصلت عندك حالة وفاه ولقيت واقف معاك كتف بكتف
بتنسي انه عمل معاك كل اللي فات ده وكمان بتنسي انك عملت معاه زي ما عمل معاك
انك عشت المواقف بتاعته كلها معاه
كانكم روح واحده في جسدين انكم توائم بل اكثر من التوائم فالصديق دليل صديقه

صديقي العزيز

اعتذر اليك عن كل اسأه عن كل لحظة فراق لظروف انت تعلمها
صديقي اعلم انك تسأل (ايه الهبل ده , الواد مخه لسع ولا ايه مااحنا تمام) اقول لك يا صديقي
اسف
اذا ما حدث بيننا اي من هذا في اي يوم من الايام فأنا اسف يا صديقي العزيز
فأنا لا استطيع ان اكمل حياتي بدونك

لك مني يا صديقي كل حبي الذي تبقي في قلبي بعد ما تعرف