في الاول أنا بعتذر للناس كلها علشان غيابي عنهم بس والله غايب غصب عني
بعيد عنكم ورايا أمتحانات
المهم
أنا أصلا ماليش نفس للحياه من الاساس
وازاي أصلا أي حد يكون ليه نفس بعد ما الحكومه الرشيده بتاعتنا رفعت سعر المازوت للضعف في يوم وليله
تعرفوا ان رفع سعر المازوت أثر تقريبا علي كل حاجه
طن الحديد بقي ب 5000 جنيه مصري فقط
الطوب بقي ب 320 جنيه بعد ما كان ب 220
الاسمنت عدي ال 400 جنيه
يعني الحمد لله قطاع العقارات في مصر أتدمر
يعني أكتر من مليون عامل بيشتغلوا في القطاع ده بقم والحمد لله عاطلين
ده غير طبعا القطاعات المساعده
يعني النقل والموزعين الفرعيين لمواد البناء و.....و...و
ده غير ان الشباب معدش قدامهم فرصه انهم يحلموا أنهم في يوم من الايام يخطبوا ده بعد ما جرام الدهب 24 قيراط عدي 155 جنيه
مش لازم يجيبوا دهب طيب شوفوا الشقق أسعارها هاتوصل لكام
يعني الحمد لله اللي أتجوز يبقي نفد بجلده
واللي عنده شقه بقي عنده كنز
ده بعد 31 من انتفاضة الشعب ضد الغلاء
أعتقد أنهم بالمقارنه بالوقت ده كانوا مرفهين
بس هما كانوا رجاله
كانوا عارفين يقولوا لاء
كانوا يقدروا ينزلوا الشارع
كانوا بيهزوا ويزلزلوا قصر العروبه
انما أحنا
؟؟؟؟؟؟؟؟؟؟؟؟؟؟؟؟
اسف للغم ده
بس ده مش ولا حاجه جنب البلاوي اللي الخكومه الرشيده عاملاه بره
السيد الوزير أحمد أبو الغيط مستكتر علي معارضه ب 45% تلت مقاعد الوزاره +1
السيد الوزير تقريبا مش بيقرأ
علشان لو بيعرف يقرا كان قرأ ميثاق العيش المشترك
اللي حتي الدستور اللبناني أقر بيه في أول مواده
تقريبا برضه والله أعلم انه كان فاكر أنه بيتكلم عن مصر
مصر اللي جماعة الاخوان ممثلين في البرلمان ب88 عضو بعد التزوير
مش معترف بيها
مصر اللي فيها لجنه أسمها لجنة الاحزاب كل مهمتها أنها تمنع الاحزاب الجاده
مصر اللي مابقاش فيها حد يقدر يرفع صوته
علشان كلهم بقيم في المعتقلات
مصر اللي الشرطه فيها ولا بلاش علشان معنديش تعبير محترم يناسبهم
مصر اللي جمال عبد الناصر قال فيها أرفع رأسك يا أخي
دلوقتي بقيم بيسجدوا لألههم اللي في البيت الابيض
الاستاذ هيكل بيقول عليهم ملوك وعمال ونواب الامبراطور
أنا بقول أنهم عبيده
واقول ليه يا مصـر ولادك كـده
يا إمـا المذله يا يتـجبـروا
يا خوفـي يا فـرحة قـلوب الـعدا
ويا نـدمـي لو ما يتغيـروا
عمي صلاح جاهين
بحبك أوي يا مصر
ونفسي ترجعي تاني مصر
3 comments:
يارب أكون أول تعليق
أمبارح فى المصرى اليوم كانوا كاتبين عن ثورة الجياع اللى السادات سماها ثورة الحرميه
وفى خبراء بيقولوا أن الثوره لن تتكرر عشان مواطن 2008 أضعف من مواطن 77
وأنا معاهم أنا أكتر حاجه بنعملها نهلل ونقول ده حصل وحصل وحصل وفى الاخر نقول حسبى الله ونعم الوكيل ولو فضلنا كل كده هنموت وأحنا مبنعرفش نعمل حاجه غير أننا نقول حسبى الله ونعم الوكيل
بس لازم نعرف
ان الله لا يغيروا ما بقوما حتى يغيروا ما بأنفسهم
لازم نتغير بقى لازم يطلعلنا صوت
لازم نتحرك
....
لازم نتحرك
....
لازم نتحرك
انا متشكر لاضافة مدونتى بس ممكن يكون الرابط
السيد شبل . بلا اسم
الاحداث بالفعل مؤسفة اوى ..ومش لاقية حاجة مناسبة ممكن تتقال الصراحة
الاوضاع فى البلد بالشكل ده من فترة وبما اننا اتبعنا سياسة السكوت والصمت
صعب اوى ان ما كنش مستحيل يحصل غير كدة !!!
انا مش متشائمة ولا حاجة والله ..بس مش شايفة غير كدة قدامى ..مافيش مؤشر واحد يوحى بغير كدة
بس عموما الله معنا
تحياتى
:)
Post a Comment