دي صوره في الدويقه
الناس بتبيع الميه
الناس عايشين في حضن الجبل ولو لاحظتوا في دايره سوده فوق
دي غرفه والسقف بتاعها هو الجبل نفسه وحصل وفي صخور بتنزل علي الناس وبتموتهم
متخيلين الناس دول عايشين ازاي محرومين ختي من الميه
الاسره الواحده أب وأم وأطفال وأحتمال كمان أهل الاب والام يكونوا معاهم
تخيلوا دول كلهم في غرفه 3*4 م
متخيلين الناس دول عايشين فين وفيه بني أدم واحد عندنا اسمه أحمد باشا عز عنده أكتر من أربعين مليار جنيه
متخيلين
متخيلين ان الناس دول أصلا حد حاسس بيهم
عايشين ولا ميتين
طيب لو حد حاسس بيهم (مش مننا لاننا معاهم اصلا قصدي من أهل الحل والعقد زي ما بيقولوا عليهم) البني أدم يكون عايش ازاي
متعايش مع نفسه ازاي
ودلوقتي بعد اللي حصل
مين المسؤل
النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر
مصر الرمال العتيقة وصهدها الجبار
والنيل كخرطوم حريقه وحيد في وسط النار
في إيدين بشر نمل رايحه وجاية ع الضفة
فيهم مطافي وفيهم كدابين زفة
وفيهم اللي تعالى وقال أنا حكمدار
وكل باب م البيبان مقفول على اسرار
وكل سر بحريقة عايزة تتطفا
من أهلي تندهلي وتقوللي تعا اتدفا
أنا اللي عمري انكتب إلى يوم ما اتوفى
على اسم مصر
ربنا يرحمك يا عم صلاح
ويرحمنا كلنا
12 comments:
ياه يا محمود
وفيه امر من كده مية مرة كمان
وانت عارف
الواقع ابلغ بكثير من الصور
ربنا يكون فى عون الناس دول
اكيد الوضع فى الدار الحق هيكون مختلف عن الوضع هنا
وده عزاؤنا الوحيد
تدوينة مؤلمة لكنها موفقة
سلام
عايزه اقولك ان الصور وجعتنى وكلام جاهين وجعنى اكتر
مش عارفه امتى اللى فوق هيحسوا بالناس دى بجد
ربنا يكون فى عونهم
وربنا على الظالم
تحياتى على المدونه المؤلمه
سلام عليكم
عارف؟! الصور اللي حضرتك جبتها دي مؤلمة طبعا و بتوجع أوي. بس دي صور انت عرفت توصلهاو عرف يصورها أصحابك... فيه مئات المناطق في مصر زي دي " و يمكن أسوأ كمان"
المهم احنا بنعمللهم ايه؟ بحييك يجد انك عملت البوست دة لأنك كدة على الأقل ..مش هقول لك خليت الناس تعرف ان فيه مناطق كدة لأن الكل عارف، بس بجد لأنك "فكرت" الناس بالناس المسكينة اللي محتاجة اي حد جنبها
بوست موفق جدا
يا سبحان الله
مش عارفة اقول ايه بصراحة
والله مش لقيا اى حاجة ممكن تتقال
طيب ليه
؟؟؟؟؟؟
مش عارفة ...بجد ربنا يكون فى عونهم
مصر
تعتبر كلمة حزينة دلوقتى
من غير اى امل
حسبنا الله ونعم الوكيل
اللي حصل حاجه تقطّع القلب والله
أنا آسفه في اللي هاقوله
بس دول لو حيوانات كانوا عملوا علشانهم أماكن للإيواء والرعاية
بس للأسف دول يا دوب بني آدمين مالهومش تمن
أرواح مالهاش لازمة
أهو أزمة الانفجار تخف شوية
حسبي الله ونعم الوكيل
Lyssandra
يا حسرة علي العباد
حسبي الله ونعم الوكيل
العجوز
يابنى مبقاش فيه امل من الكلام مش هيفيد الكلام بص انا لو تفتكر قلعة الكبش روحت هناك يوم الحريقة المشهورة دى البيوت اتفحمت عارف يعنى ايه
ويوم ما ازالوا البيوت دى كان قمة المهزلة والمهانة وقلة الادب بجد مش ممكن تتخيل ناس واقفة مترميه بعفشها وسط التراب والبولدوزرات بتشيل فى بيوتهم والبهوات لابسين كمامات خايفين لا تربايه تخش تخنقهم ولا حاجة
حسبى الله ونعم الوكيل
أنا علقت قبل كده لما نشرت البوست ف الاول بس عايزه أقول تانى حسبى الله ونعم الوكيل
مؤخرا نزلت منطقة عشوائية عشان اصور فيها
المنطقة كان اسمها "بطن البقرة " مهما كنت اتخيل عن العشوائيات ,لم اصل الى تلك المرحلة
بجد يعيشون مع القمامة والحيوانات
البيوت أصلا من غير سقف وملتصقة ببعضها
بجد انا اكتئبت فترة على اللى شوفته
يعنى انا آخرى ديتول وهخلص من التراب والميكروبات دى
لكن هما عايشين معاها
بجد حاجة مؤسفة
الناس دى انا منتظرة منها ثورة جياع بجد
ستقضى على اليابس والأخضر
ولاعزاء للإنتماء والوطنية وكل هذه الشعارات
سيبك من المأسى دلوقت ياعم
كل سنة وانت طيب وعيد سعيد عليك
انت فين يا عم كل سنة وانت طيب
وتقبل الله طاعتك
العجوز
Post a Comment