جالي تاج من صاحبي
wanna-b-a-physician
التاج ببساطه أذكر عشرة أشياء عن نفسك
بمقدار بساطة التاج بمقدار صعوبته
أنك تتكلم عن نفسك ومن وجهة نظر نفسك دي حاجه معقده وصعبه
عموما أنا هاحاول أكون محايد وانا بأتكلم عن نفسي
واحد مصري عايش في البلد دي مسلم وفي كلية هندسه جامعة الازهر
.
بحب الحياه قوي وبحب الوحده والهدوء جدا جدا بحس وأنا لواحدي أن الدنيا كلها في أيديا.تقريبا معقد نفسيا.
.
حلم عمري كله أني أدخل هندسه والحمد لله ربنا وفقني ودخلتها وبعد ماحققت حلمي ماكنش فيه حلم تاني ولما لقيت حلم تاني لقيتها أتخطبت عادي بقي ودلوقتي حلمي أني أشوف بني أدم مش من عيلة مبارك بيحكمني
أصلي أتعقدت منهم
.
متردد بشكل صعب بس ده في المواقف العاديه اللي بتستحمل التردد أنما فيه مواقف تانيه بكون حازم جدا فيها وبتخذ القرار بسرعه جدا صح غلط مش بتفرق اللي بيفرق ساعتها أن فيه قرار لازم يتاخد ولو ما أخدتش القرار ده ممكن تحصل مشاكل أكبر بكتير من المشاكل اللي هاتحصل لو أتخذته خطأ
وبقدر أتحمل المسؤليه لأني محطوط فيها من وانا صغير كبير أبويا وأول حفيد ولد في البيت بتاعنا
.
ممكن أقول علي نفسي أبن سوق وبعرف قيمة القرش من صغري وأنا بأشتغل في الصيف وأحيانا كتير في الدراسه برده وبصرف بشكل كبير جدا علي نفسي في الصيف والحمد لله وصلت في الشغل بتاعي لأعلي حاجه فيه أحيانا كتير كان بيشتغل تحتي ناس عندها أحفاد
.
تقريبا بتكسف جدا من أي حد غريب وبكون شخصيه غيري تماما ومش بتكلم كتير قدام أي حد غريب ومع كده أحيانا لما بكون رايق قوي ممكن أتكلم مع أي حد في الدنيا حتي ولو كنت مقابله في الشارع وممكن تضرب صحوبيه جامده علشان كده أنا بعرف ناس من كل المستويات من أول الحراميه والبلطجيه لحد الدكاتره والمهندسين وكل واحد ليه تعامل غير التاني
تقريبا عندي شيزوفرانيا
وكمان عندي عقده من البنات
(أنا حاسس أن اابي بتحضر زير علشان تخبطني بيه)
بس أنا والله مش بأكدب
فعلا عندي عقده من الجنس الاخر بتوتر جدا ووشي بيحمر ويصفر وأحيانا بيقلب علي بنفسجي لو مثلا مثلا يعني قعدت جنب واحده في المواصلات ببقي قاعد مربع أيديا وكامش نفسي واللي يشوفني يقول عيل في الابتدائي قاعد قدام مدرس العربي الغبي بتاعه
.
ببساطه جدا
أنا ميال لليسار ومع كده بحب الليبراليه جدا وكمان مسلم بيحاول يكون متدين
يعني دماغي فيها التيارات السياسيه كلها
وطبيعي جدا أني اكون متناقض مع نفسي في حاجات كتير بس بحاول اني أجمع ما بين المتناقضات
بحب عبد الناصر جدا وبكره السادات جدا
بحس أن ناصر مع كل الملاحظات والكلام الكتير بحس أنه كان راجل
راجل بجد
.
أحترم كل صاحب وجهة نظر حتي ولو كانت تهدم وتنسف ما أقتنع به
وعندي قبول كبير جدا جدا لكل الأراء المخالفه لرأيي ومعنديش أي مشاكل في الموضوع ده
فيه ناس كتير بيرفضوا الأخر من منطلق ديني
مشكلتي مع معظم اللي أعرفهم أني مؤمن بقوله تعالي (كل نفس بما كسبت رهينه) ومؤمن جدا أن كل واحد حر في حياته لان هوه اللي هايتحاسب وكل اللي عليا أني أنصحه وبس
قال تعالي (أدعوا الي سبيل ربك بالحكمة والموعظة الحسنه)وده بيدخلني في نقاشات عنيفه جدا مع أعز اصحابي
.
بعشق الادب
كل الادب
من أول البخلاء للجاحظ الي روايات مصريه للجيب مرورا أكيد بروائع نجيب محفوظ وتشارلز ديكنيز وشكسبير وهيمنجواي وتلستوي والعبقري ثيودور ديستويفسكي
ومعاهم هاري بوتر ومعظم روايات أجاثا كريستي وستيفين كنج
وعمنا محمود السعدني وأنيس منصور والدكتور مصطفي محمود
بعشق الشعر وخصوصا أحمد مطر الرائع
وأمل دنقل والعبقري نزار قباني وفاروق جويده وبيرم التونسي
بحب معلقة عمرو بن كلثوم جدا جدا
بتحسسني بكبرياء مات من زمان
عمي العبقري صلاح جاهين في ركن لواحده طبعا
.
ليه في كل سنه نوبة أكتئاب ومش بكون أعرف سببها يعني مش بكون حابب أتكلم مع أي حد ومش عايز أعمل أي حاجه وبكون دايما قاعد لواحدي ده غير حب الوحده اللي في طبعي أصلا دي حاجه تانيه
هادي جدا ومبتسم حتي في أصعب المواقف بأستثناء المواقف المتعلقه بالجنس الاخر بكون فيها متوتر ومرتبك ومش عارف ليه بكشر
بعشق الافلام الاجنبيه والالعاب خصوصا الالعاب الاستراتيجيه ليه عندي معزه جامده
بحب الشطرنج مع أني في أحيان كتير بتغلب
:)
أحيانا بكون صبور جدا وأحيانا تانيه مش بيكون عندي صبر خالص
مش عارف ليه برضه تقريبا شيزوفرانيا
كنت هانسي
أنا بحب النظام جدا بس مش بحب أكون منظم يعني مثلا لو حد دخل الاوده بتاعتي ممكن يغمي عليه من الفوضي (فوضي مش زباله)
بس لما بنكون في الشغل أو مع ناس غريبه لازم يكون فيه نظام والشي اللي بيمس حد تاني غيري لازم أكون فيه منظم جدا
غير كده بعشق الفوضي
.
تقريبا دي معظم الحاجات اللي أعرفها عن نفسي
.
أنا بهدي التاج ل
أختي الكبيره هبه اللي عايزه تكون فراشه
أستاذي صاحب وجهة نظر
أخويا محمد حمزه
اخويا السيد شبل
let me dream.
المفروض أني أبلغهم أن فيه تاج علشانهم
وكمان المفروض أني أبلغ wanna-b-a-physician
أني نزلت التاج
.
يا دكتور أنا نزلت التاج زي ما وعدتك
.
تحياتي للجميع
