Sunday, January 27, 2008

حيره

أنا محتار جدا

مش عارف أكتب ولا ما أكتبش

مش عارف أعيش ولا أموت

مش عارف أحب ولا أكره

بجد مش عارف

مش عارف ليه لما يسيطر عليا أحساس ما في لحظه معينه في اللحظه التانيه بيضيع مني

.

مش عارف ليه لما أبدا احب بيتولد مع الحب ده الخوف

ومفيش حب مع الخوف

.

مش عارف ليه في اللحظه اللي بكون فيها مبسوط اوي لازم أفتكر أني عايش في مصر

.

مش عارف ليه مليان احباط

.

مش عارف احنا فين

ورايحين علي فين

.

أين نحن

ضاعت العراق

ضاعت فلسطين

أضعنا أنفسنا

ولازلنا نياما

أو أمواتا

.

اين نحن؟

من العظماء

من عمر

وخالد

وأبي الدرداء

.

أين نحن؟

أنحن خير أمه

أم كثير كغثاء البحر

أم مجرد

لا شئ

مجرد حلم

أحلم به

وسوف أستيقظ

فيبدوا أن وجودي مزيف

وتاريخي مزور

وكلامي

وكل الحياه

.

أين نحن؟

وأين هم؟

هم في محراب العلم ساجدون

ونحن في محاريب الجهل غارقون

بما سواه كافرون

هم في الحروب ساده

ولا هم لنا سوي

أهدائهم رمز السياده

.

.

ومعرفتش أكمل

وقفت

عقلي عاندني

ايه اللي هايحصل بعد ما تكتب

.ايه اللي هايعود عليك

أنك قولت رائيك

انك عبرت عن اللي جواك

وبعدين

.

أنا مش عارف وبعدين

ومش عارف أنا بكتب كده ازاي

أو ليه

.

عايز أكتب وخلاص

أكتب أي حاجه ولأي حد

.

ممكن تكون حالة تهييس


.

المشكله كل المشكله أني مش قادر اربط أفكاري

مرتبك ومشوش ومخنوق ومش عارف ليه وده خانقني أكتر

.

ساعات بحس ان قلبي هاينط من مكانه

مش عارف ليه برده J

وساعتها بحس أني بحب الدنيا كلها

.

بمقدار الحب يا محبوبتي

أحبك

بمقدار الليل الاسود

يشقه ضوء ثناياكي

أحبك

بمقدار الحياه

أحبك

عندما يتطابق الشيئين

تكونين أحدهما

وأكون ألأخر

عندما يهب النسيم

حاملا عبق الزهر الاحمر

النابت بخصائل شعرك

لا يكون في الكون

سواكي

.

.

مرتبك ومش مرتب أفكاري

مش عراف ارسي علي جنب

.

ومش عارف أن ليه رخم كده

أنا مش عارف

ومحتار جدا

.

أنا أسف لكل اللي هايقرا الكلام ده

بجد اسف

.

ياريت محدش يحلف انه مش هايعتب المدونه دي تاني


اسف كمان مره

Saturday, January 19, 2008

شوية غم 31 سنه علي ثورة الجياع 19 -1-1977

في الاول أنا بعتذر للناس كلها علشان غيابي عنهم بس والله غايب غصب عني
بعيد عنكم ورايا أمتحانات
المهم
أنا أصلا ماليش نفس للحياه من الاساس
وازاي أصلا أي حد يكون ليه نفس بعد ما الحكومه الرشيده بتاعتنا رفعت سعر المازوت للضعف في يوم وليله
تعرفوا ان رفع سعر المازوت أثر تقريبا علي كل حاجه
طن الحديد بقي ب 5000 جنيه مصري فقط
الطوب بقي ب 320 جنيه بعد ما كان ب 220
الاسمنت عدي ال 400 جنيه
يعني الحمد لله قطاع العقارات في مصر أتدمر
يعني أكتر من مليون عامل بيشتغلوا في القطاع ده بقم والحمد لله عاطلين
ده غير طبعا القطاعات المساعده
يعني النقل والموزعين الفرعيين لمواد البناء و.....و...و
ده غير ان الشباب معدش قدامهم فرصه انهم يحلموا أنهم في يوم من الايام يخطبوا ده بعد ما جرام الدهب 24 قيراط عدي 155 جنيه
مش لازم يجيبوا دهب طيب شوفوا الشقق أسعارها هاتوصل لكام
يعني الحمد لله اللي أتجوز يبقي نفد بجلده
واللي عنده شقه بقي عنده كنز
ده بعد 31 من انتفاضة الشعب ضد الغلاء
أعتقد أنهم بالمقارنه بالوقت ده كانوا مرفهين
بس هما كانوا رجاله
كانوا عارفين يقولوا لاء
كانوا يقدروا ينزلوا الشارع
كانوا بيهزوا ويزلزلوا قصر العروبه
انما أحنا
؟؟؟؟؟؟؟؟؟؟؟؟؟؟؟؟
اسف للغم ده
بس ده مش ولا حاجه جنب البلاوي اللي الخكومه الرشيده عاملاه بره
السيد الوزير أحمد أبو الغيط مستكتر علي معارضه ب 45% تلت مقاعد الوزاره +1
السيد الوزير تقريبا مش بيقرأ
علشان لو بيعرف يقرا كان قرأ ميثاق العيش المشترك
اللي حتي الدستور اللبناني أقر بيه في أول مواده
تقريبا برضه والله أعلم انه كان فاكر أنه بيتكلم عن مصر
مصر اللي جماعة الاخوان ممثلين في البرلمان ب88 عضو بعد التزوير
مش معترف بيها
مصر اللي فيها لجنه أسمها لجنة الاحزاب كل مهمتها أنها تمنع الاحزاب الجاده
مصر اللي مابقاش فيها حد يقدر يرفع صوته
علشان كلهم بقيم في المعتقلات
مصر اللي الشرطه فيها ولا بلاش علشان معنديش تعبير محترم يناسبهم
مصر اللي جمال عبد الناصر قال فيها أرفع رأسك يا أخي
دلوقتي بقيم بيسجدوا لألههم اللي في البيت الابيض
الاستاذ هيكل بيقول عليهم ملوك وعمال ونواب الامبراطور
أنا بقول أنهم عبيده
واقول ليه يا مصـر ولادك كـده
يا إمـا المذله يا يتـجبـروا
يا خوفـي يا فـرحة قـلوب الـعدا
ويا نـدمـي لو ما يتغيـروا
عمي صلاح جاهين
بحبك أوي يا مصر
ونفسي ترجعي تاني مصر