Tuesday, June 19, 2007

ثلاثة أيام

أنا بعتذر عن استكمال بلا عنوان في البوست ده وان شاء الله البوست الجاي هاكمل
الاسباب اني حابب اكتب عن تجربه وايام جميله عشتها انا واتنين اصحابي مع بعض
يا ريت تعجبكم
كنا انا واحمد ومحمد (أحمد ومحمد دول جماعه اصحابي ) المهم كنا مع بعضينا من يوم الاربعاء
محمد كان جاي من أسيوط علشان يشارك في حملة توعيه ضد مرض السل وأنفلونزا الطيور الحمله دي كانت في مستشفي الصدر في العباسيه واللي كان منظم الحمله دي منظمه اسمها – أمسا – ومعناها رابطة طلبة كلية الطب في جامعة الازهرودي بقي منبثقه من حاجه اسمها –اسما بكسر الالف الاولاني- ودي بقي بتاعة مصر كلها
ألمهم محمد هوه اللي جمعنا مع بعض التلات تيام دول مع انب انا واحمد مع بعض علي طول بس التلات تيام دول كانوا فعلا مميزين
اه نسيت محمد ده طالب في كلية طب الازهر فرع اسيوط وفي سنه تالته وله نشاطات كتير
أما عمنا احمد فده في كلية تجاره وبسم الله ما شاء الله طالع سادس الدفعه السنه اللي فاتت
اول يوم الاخ محمد جاء من اسيوط الصبح وقضاها نوم لحد بعد العصر يجي بساعتين ولا حاجه
المهم شديت محمد من علي السرير بالعافيه ورحنا لأحمد في العباسيه وكنا قرب المغرب كده وميتين من الجوع فأحمد عمل معانا دور رجوله وعزمنا عند الشرقاوي – ناكل كبده ومخ مش سمك- وبعد ما أكلنا خدنا بعض ونزلنا الحسين وطبعا فركناه مشي خان الخليلي وشارع الصاغه وحواري الحسين وحارة اليهود ومن حارة اليهود للموسكي والعتبه وطبعا ده كله لف نقف شويه قدام محل ولا فرش ونمشي شويه وبعد ماخلصنا العتبه والموسكي لف وطبعا قبلهم الحسين كله - متخيلين كم المشي اللي مشيناه –
قلنا ننزل وسط البلد وبدل ما نركب اتوبيس ولا مترو زي البني ادمين رحنا واخدينها مشي من عبد الخالق ثروت لحد لما وصلنا مول طلعت حرب بصراحه أنا ما دخلتش المول ده قبل كده فقلتلهم يلا ندخل ودخلنا
بصراحه المول كله أصغر من الفود كورت بتاع سيتي ستارز خلصنا لف فيه وبعدين طلعنا علي التحرير وعدينا من قدام جامعة الديول العربيه قصدي جامعة الدول وبلاش غلط بقي
ورحنا علي كوبري قصر النيل وقفنا هناك شويه وبعدين قررنا اننا نعدي نروح نشوف الاوبرا دي شكلها عامل ازاي
بصراحه دي كانت اول مره أروح فيها هناك ومحدش فينا عارف حاجه
وبصراحه أكتر كنا خايفين ندخل من البوابه أصلا كان فيه رجال امن كتير يجي شويه حلوين كده ومعظمهم لابسين بدل ملكي ذي الدواليب اللي بيمشوا ورا الريس قلنا يا عم بلاش غلط
أحنا شوفناهم من هنا وقلنا فيه حاجه جوه
المهم
قعدنا نتحايل علي بعض
خش انتا
طيب ما تخش أنتا
لحد ماربنا كرمنا ودخلنا كنا لسه بدري شويه كانت الساعه تدخلها في 10,30
دخلنا وكان داخل قبلنا علي طول واحد راجل –عرفتوا أحنا ايه اللي شجعنا وخلانا ندخل – فسألناه فيه حفلات النهارده فقالنا كان فيه حفلة البروشيه ولا والله مش عارف المهم هيه حاجه زي كده بس هيه خلصت
فأخدنا بعضنا وطلعنا واحنا بنضحك علي نفسنا ونتريق علي اسم الحفله
وبعد ما طلعنا من الاوبرا اتمشينا علي الكورنيش لحد لما وصلنا ميدان الاخ عبد المنعم رياض ركبنا من هناك أتوبيس لحد الدمرداش وبعدين أحمد نزلنا علشان كان جعان نزلنا وأحمد دخل أكل علي عربية كبده من عند واحد اسمه ابو محمود
وبعدين أخدناها مشي-بقيت بكره الكلمه دي – لحد العباسيه وكنا ماشيين في شوارع وحواري عجيبه
وصلنا العباسيه بحمد الله وقلت هاقعد شويه بقي طلعلنا عفريت هانروح مدينة نصر علشان الميه كانت قاطعه في العباسيه في اليوم ده
نزلنا أشترينا شطرنج وطلعنا علي مدينة نصر
وقعدنا نلعب شطرنج لحد لم نمنا
اليوم التاني بقي
الخميس 12 -4 -2007
محمد راح الحمله بتاعته واحمد راح الكليه وأنا أنتخت وتنتني نايم صحيت لقيت العيال رجعوا فنزلنا قعدنا شزيه علي سيبر نت وبعدين خدنا بعضنا ورحنا العباسيه وقديناها قدام التليفزيون وللبخت الاسود الموتور بتاع الميه اللي عند احمد باظ يوميها وكانت حاجه تقرف أصلا وعدنا الي مدينة نصرتاني وقديناها شطرنج برده لحد لما نمنا
تالت يوم
الجمعه 13-4-2007
Friday 13
بعد مانمنا طبعا العيال صحوا وصاحبكم طبعا نام لحد لما شدوني من علي السرير أتوضينا وصلينا في جامع النور ونزلنا علي القلعه وفي القلعه أحمد كان مصمم انه يتكلم مع بنات واحنا قاعدين نرخم عليه ونمسيه غصب عنه ملحوظه( أحمد بطل كمال أجسام واخوكم ومحمد عصافير يا عيني جنبه )
ودخلنا مسجد محمد علي وطبعا انبهرنا بيه كالعاده وبعد ما طلعنا الدنيا مطرت
بجد كانت حاجه جميله والقلعه تقريبا فاضيه وكل الناس اللي فيها بيجروا من الشتا والدنيا قعدت تمطر وتبطل وأحنا ولا في الدماغ
لفينا القلعه طبعا وأخر عهدنا بها كان المتحف الحربي

انا شفت وأنا داخل من الباب جوز عيون علي واحده خوجايه
معرفتش أعمل ايه
تنحت يعيني قدامها
ودي بقي كانت أجمل حاجه شفتها اليوم ده
وأحنا خارجين من المتحف احمد قابل بنت مصريه قمحيه كانت ماشيه مع صاحباتها اتكلم معاها اه احمد كان سبقنا في الخروج من المتحف ولما حصلناه ولقيناه قاعد يتكلم مع مجموعة البنات رحنا انا ومحمد مرخمين عليه وواخدينه وماشيين
ومحمد فيه بنت عجبته برده بس برده خليناه ينفض
نزلنا السيده علشان نركب اي حاجه رايحه رمسيس علشان محمد يرجع اسيوط بقي –خنقني وخلاني اشحت-
رحنا علي رمسيس نزلنا قدام حلواني التيسير
كنت عايز أاكلهم حاجه حلوه
وبقول لمحمد يكمل علي الفلوس علشان نجيب حلويات راح محمد مطلع المحفظه وبيدور فيها ملقاش غير 15 جنيه
يا خبر فين الفلوس –فلوس السفر-مش لاقيها
طيب أفتكر كده يبني ده سيادتي بقول كده لمحمد
محمد قعد يفكر واكتشف انه نساها في اسيوط علي المكتب بتاعه
يا خبرك أبيض حد ينسي الفلوس يابني طيب تخيل لو احنا مش معاك كنت عملت ايه يلا خير
رحنا المحطه علشن نحجز لسيادته بس قبل ما نروح نحجز اكلنا حلويات الاول طبعا –هبل-
ونروح نحجز نلاقي القطورات كلها محجوزه ومفيش ولا كرسي فاضي
قعدنا شويه كويسين مع بعض يجي ساعتين كده لما أحمد كان بيعيط وقمنا عاملين ري تشارج لمحمد
وقعدنا أحنا علي فيض الكريم
بصراحه الموقف ده ضرب اليوم كله
ورحنا واخدين بعض أنا وأحمد وماشيين
جينا نمنا طبعا
3 ايام ارهاق ولف وسهر ومصاريف وخراب بيوت
بس الصراحه
كانوا 3 ايام زي العسل

شكرا يا محمد
شكرا يا أحمد

علي الوقت الجميل ده


Tuesday, June 12, 2007

بلا عنوان 3

صحوت مجهدا بعد سهرة البارحه
كانت سهره جميله ذكرتني بايامي المبكره
وقت ان كنت اعمل في وكالة ابي
أقف مساعدا له في ترتيب وبيع البضائع
وفي غيابه
أكون سيدا علي جميع العاملين
أامر فأطاع
أترك الوكاله لأزهب مع اصدقائي
نتسكع في شوارع المحروسه
نذهب الي شقة احدنا
نتناول الحشيش والمسكرات
لأعود مسطولا الي أبي
يعنفني بشده
يكاد يضربني لولا انني تعديت هذه المرحله
يهددني بقطع الاموال من يدي
أعتذر له مبديا اسفي
أعده أنني لن أعود
نظل أياما في عبث وهم
يكاد ينسي ما حدث
اتودد اليه
فيسامحني
كان عظيما هذا الرجل
ساعد الكثيرين وعطف علي الاكثر
أتذكر هذا اليوم جيدا
يوم شتوي تشرق فيه الشمس بشكل مبهج
كنت استمتع بحرارة ودفء الشمس وقت ان رايته للمرة الاولي
كان بائسا حزينا
يدخل حوانيت السوق ويخرج منها دون ان يشتري أو يبيع شيئا
وقف حائرا
تقدم نحو وكالة أبي بخطي وئيده
دخل الي ابي بالداخل
حادثه بأمر ما
وخرج من عنده
منكسرا حائرا حزينا
يكاد يقع نت فرط الاجهاد والالم
لست أدري ماذا حدث
ماذا بك يا صديقي
قلتها وقلبي يكاد ينخلع من مشهده
فرغم كل ما انا عليه الا أنني ورثت اشياء جيده من ابي
لاشئ شكرا لك
مجيبا علي سؤالي بوجهه النحيل النبيل وعيناه العسليتان
كلا يا صديقي لقد دخلت كل حوانيت السوق ولم تجد ما تريد ودخلت لأبي وردك عن طلبك
أنا أعلم هذا
فهذا الوجه كصفحه من صفحات الكتب يطبع فيها كل ما يعتمر في نفسك
ونحن أهل الاسواق خير من يستطيع قراة الوجوه
ظهر في عينيه بريق الدموع وخرج الصوت من حلقه كحشرجة الموت
توفيت والدتي وسبقها أبي ولم يعد أي شئ في هذه الحياه
ولابد أن اجد عملا حتي أستطيع أن أحيا
ما أصعب هذه الحياه وما اهون الانسان
تركته ليهدأ قليلا وطلبت له كوب من الليمون المثلج
ودخلت الي ابي
تكلمنا كثيرا
أقنعته انني متحمل مسؤلية هذا الفتي
فأنا وهو تقريبا لنا نفس العمر وهذا ما يجعلني متحمسا له بشكل كبير
لم يكن لي اخوه في يوم من الايام
وحيد هكذا عهدت نفسي
رغم كل هؤلاء الاشخاص
لم يكن لي صديق بشكل حقيقي
فكل اصدقائي أو ما يمكن ان يطلق عليهم هذه اللفظة هم هؤلاء الفتيه
نتسكع سوية ونسكر سويا ولا يفعلون اي شئ ذو نفع
خرجت اليه مبتسما
ألف مبروك يا .......... ما أسمك؟
أحمد
ألف مبروك يا أحمد أنا أخوك باسم أبن الحاج محمد صاحب الوكاله
أنا مش عارف اقولك ايه كل اللي هاقدر اقولهولك جميلك ده مش هانساه طول العمر
يا بني ولا جميل ولا حاجه يلا ادخل للحاج قبل ما يرجع في كلامه
عجيب هذا الشعور بالفرحه بالامل
جميل أن تري وجها يتحول من البكاء الي الضحك
من العبوس الي الابتسام
ما أغرب هذه الحياه
وما أجمل ان تجعل شخصا أخر غيرك يشعر بكل هذه السعاده
.
أعتقد أنني فعلت الشئ الصواب
.
وغدا
سوف نري التائج
.
نتائج أفعال الماضي................. وتصرفات الحاظر
.
فهما ما يحكم مستقبلنا
.
بدون تاريخ نصبح بلا مستقبل
.
.
.
يتبع
.
.
تحياتي

Sunday, June 10, 2007

بلا عنوان 2

كثيرا ما أشعر بهذا الشعور القاتل
الوحده والالم والملل والموت
أريد ان اموت ولكنني لا استطيع
فاشل حتي في انهاء هذه الحياه السخيفه
في اوائل العشرينات من عمري ومن يراني يظن انني تعديت عقدي الثالث
لا أجد من حطام الدنيا سوي نفسي فهي الوحيده التي تبقت لدي بعد كل هذا الالم
وحيد في هذه الحياه
توفي والدي وكنت مازلت لا ادرك من الامور شيئا
اصبحت امي هي كي كل ما لدي
أمي وابي واخي وعائلتي
لازلت اذكرها وهي تبتسم وهي تبكي وهي تضحك
يا الله
كم كانت عظيمه هذه المراه
كم كانت حنون ورائعه
لازلت اراها قادمة باتجاهي اسمع صوتها مناديا
احمد تعالي عايزاك
احمد انزل روح لعم ابراهيم هاتلنا جبنه وبيض علشان العشا
كم أفتقدك يا أمي؟
كم عالجت من المشاكل؟
أشعر أنني تائه بدونك
لا ادري كيف حييت بهذه الحياه دونك
أراكي في كل مكان بغرفتنا الصغيره
هناك علي كرسيك
تجلسين لتعدي لنا الطعام
علي هذه الاريكة اراكي تنظرين الي باشفاق وتدعين لي بالشفاء
اراك هنا
علي هذا السرير لا تتحركين لا تستجيبين لندائي
ماذا حدث لكي يا اماه
لست ادري
البقاء لله
هكذا وصف لي الطبيب حالك
لم ادري ماذا افعل
وحده الله هو من يستطيع مساعدتي
البقيه في حياتك يا احمد
حياتك الباقيه يا عم علي
لم يكن مجرد جار يقطن بجوارنا علي السطح بل كان كفرد من افراد العائله
هو من فعل كل شئ
هو من واراكي التراب
هو من تقبل معي العزاء
هو من فعل بي كل هذا المعروف
تعبتك معايا قوي يا عم علي
أيه يا احمد يا ولدي بلاش الحديت ده
دا انتا زي محمد ولدي الله يرحمه
امك كانت ست طيبه قوي يا احمد يا ولدي وعمري ما هانسي وقفتها معايا أول ما جيت علي مصر
ربنا يكرمك يا عم علي
اسيبك تستريح شويه يا احمد
ألف شكر يا عم علي
ذهب وتركني غارقا في حزني وذكرياتي
أحاول ان افكر في مستقبلي كيف ساحيا بدونها
مازلت في الثامنة عشر وليس لي تجارب بهذه الحياه
وحيد
تتكرر هذه الكلمه في ذهني
لا استطيع الفكاك منها
ما السبب
ما هذا الشئ الذي يحرمنا ممن نحب
لا اله الا الله
هذا امر فات وانقضي هكذا حدثتني نفسي
فكر بمستقبلك
ليس هناك اي مستقبل
بل هو موجود
سوف تعمل لتحيا
سوف تبحث غدا عن عمل
وليوفقني الله
ذهبت الي السرير
ليلتي الاولي منفردا بهذه الغرفه
يغالبني النعاس
تمر حياتي أمام عيني شريط متصل من الحزن والفرح والامل والالم
وفي النهايه
.
.
.
يغلبني النوم
يتبع يا جدعان

Friday, June 8, 2007

بلا عنوان 1

وجوه كثيره مختلفة الملامح عميقة التفاصيل تري في كل منها مشهد من مشاهد هذا الوطن في بانوراما حيه لكل متناقضات الحياه
للجمال والقبح
للنعيم والشقاء
للحب والمكره
وجوه كل منها له معني يترك في القلب انطباعا
جيدا او سيئا أقصد الانطباع
ليس هذا ما يهم
الذي يهم حقا هو كم الصدق والنقاء الذي يشع من هذه الوجوه المحفور علي ملامحها معالم الزمن
وجوه هي الوجه الحقيقي لمصر
وجوه معبره عن مصر
ووسط هذا الزخم وكل هذه الحياه
ظهر امامي هذا الوجه الاسمر الجميل الذي ترك الزمن اثره عليه
وجه منحوت مثل الجبال يتحمل صعاب الحياه ولا يكفر بها رغم كل ما تعرض ويتعرض له
عيناه السوداوان العميقتان تحملان كل هموم وامال واشراق وحزن الدنيا
عينان تستبد بك تروي لك قصص وروايات متعدده ورائعه
شعره الخشن الذي يغطي معظمه البياض
يده المعروقه
وحيد رغم الزحام
باسم رغم الالم
قوي وسط الضعف
اسمه علي
عم علي كما احب ان اناديه
كان لقائي به كافيا لاحداث تغيير في حياتي
أعتقد انني تغيرت كثيرا بعد هذا اللقاء
هو الامي الذي لا يستطيع القراه الا بالكادكشان معظم الناس في هذا الزمان
كان ينزل من القطار محملا بكثير من الاشياء
لست ادري لما كنت هناك في هذه اللحظه
لربما كان القدر الذي رتب لي هذا اللقاء
لربما هي الصدفه
لست ادري
كل ما اعلمه انني كنت هناك
مددت يدي اليه لاساعده بعدما لفت انتباهي
هات عنك
هكذا قلت له
أعتقد انه لم يشك بي كثيرا ومد لي يده ببعض مما كان يحمل
اعتقد أنه لم يكن لديه الكثير من الخيارات فهو كان وبشكل حقيقي يحتاج الي المساعده
حضرتك منين
هكذا كسرت حاجز الصمت وبدات بهذه الكلمه فصل مختلف من فصول حياتي
من قنا من الاقصر
هكذا اجاب علي تساؤلي بلهجته الصعيديه الجميله
اجدع ناس وحضرتك اسمك ايه
علي........... علي احمد
طيب يا عم علي ممكن أناديك يا عم علي علشان انا حاسس انك زي ابويا
أيوه طبعا انتا برده زي ابني
طيب رايح فين وأيه السبب اللي خلي حضرتك تيجي من الصعيد علي مصر
أنا نازل مصر هنا علشان اشتغل في اي حاجه أكل العيش بقي واعر جوي يا ولدي
بس حضرتك شكلك كبير يعني يا عم علي صعب تشتغل
الارزاق بيد الله وانا بسعي علي أكل عيشي وأسعي يا عبد أنا اسعي معاك
ونعم بالله يا عم علي بس مقولتليش انتا رايح علي فين وايه الشنط دي كلها
الشنط دي هي بقيت كل ما ما أملك من حطام الدنيا وأنا للحين مش عارف انا رايح علي فين
وجهه كان ينطق بالحزن والاسي تكاد الدموع تفر من عينيه وهو يقول الجمله الاخيره
أقترحت عليه أن ياتي معي فأنا استطيع تدبر غرفه له تكون بالقرب مني
شكرني بلطف جميل واعتذر انني لا اعرفه وهو لا يعرفني
الححت عليه الي ان وافق ولكنه اشترط أن يستاجر هذه الغرفه بنفسه متعللا أنه لم ياتي من بلدته لكي يمد يده طالبا للمساعده
وافقت علي الفور
أصبح عم علي من هذا اليوم جارا عزيزا يقبع فوق سطح بيتنا المتواضع
وأصبحنا كثيرا ما نتلاقي ونجلس سويا نتكلم في كثير من الاشياء
ياخذني في عوالم مختلفه جذابه
نظل نتكلم الي ان يصمت
وهنا استاذنه وانصرف
.
.
.
.
يتبع

Wednesday, June 6, 2007

محادثه

جميلة أنتي كليلة قدر
وسيم أنت كزرقة بحر
رقيقة أنتي كقطر المطر
حنون أنت كغير البشر
نقية أنت كوجه القمر
قوي انت كسوق الشجر
عذبة أنتي ككل السمر
واضح أنت كعين الحياه
هادئة أنتي كوقت السحر
رائع أنت كدمع الامل
أصيلة انت كأم البشر
عزيز أنت كأصل مصر
حنونة أنتي كلمسة عطر
نبيل أنت كسيد قصر
أميرتي أنتي لكل العمر
نفسي أنا والبنت الي من الممكن أني الاقيها نتكلم مع بعض بالشكل ده
حلم
تحياتي للجميع

محادثه

جميلة أنتي كليلة قدر
وسيم أنت كزرقة بحر
رقيقة أنتي كقطر المطر
حنون أنت كغير البشر
نقية أنتي كوجه القمر
قوي أنت كسوق الشجر
عذبة أنتي ككل السمر
واضح أنت كعين الحياه
هادئة أنتي كوقت السحر
رائع أنت كدمع الامل
أصيلة أنتي كأم البشر
عزيز أنت كأصل مصر
حنونة أنتي كلمسة عطر
نبيل أنت كسيد قصر
أميرتي أنتي لكل العمر
نفسي أنا والبنت اللي من الممكن الاقيها في يوم من الايام نتكلم مع بعض بالشكل
تحياتي للجميع